ប្រវត្តិសាមគ្គី ឃែភីថល
ដើម្បីអភិវឌ្ឍន៍សេដ្ឋកិច្ចជាតិ តម្រូវឲ្យប្រជាជនមានមុខរបរ ប្រកបអាជីវកម្មជាលក្ខណ: គ្រួសារ ឬជាសហគ្រាសធុនតូច និងមធ្យមទៅតាមសមត្ថភាព បច្ចេកទេស និងបទពិសោធន៍ របស់ប្រជាជន។ ដោយសារប្រជាជនជួបផលលំបាក ក្នុងការស្វែងរកប្រភពទុនដើម្បីប្រកបអាជីវកម្មរបស់ខ្លួន បានធ្វើឲ្យភាគទុនិកទាំងអស់ សហការគ្នាចាប់ផ្តើមបង្កើត គ្រឹះស្ថាន សាមគ្គី ឃែភីថល ម.ក(ពីមុនមានឈ្មោះថា សាមគ្គី ម៉ាយក្រូហ្វាយនែន អ៊ីនស៊ីធ្យូសិន ភីអិលស៊ី) បានទទួលអាជ្ញាប័ណ្ណលេខៈ ម.ហ-៦០ ចុះថ្ងៃទី ១៥ ខែ កញ្ញា ឆ្នាំ ២០១៥ របស់ធនាគារជាតិនៃកម្ពុជា និងបានចុះបញ្ជីពាណិជ្ជកម្ម នៅក្នុងព្រះរាជាណាចក្រកម្ពុជា ជាក្រុមហ៊ុនមហាជនទទួលខុសត្រូវមានកំរិត ដែលមានវិញ្ញាបនបត្របញ្ជាក់ការចុះឈ្មោះក្នុងបញ្ជីពាណិជ្ជកម្ម លេខ: Co.1051KH/2015 ចុះថ្ងៃទី ១៨ ខែ មីនា ឆ្នាំ ២០១៥ និងមាន ដើមទុនចុះបញ្ជីដំបូង១,០០០,០០០ ដុល្លាអាមេរិក។
ឈ្មោះ និងអត្តសញ្ញាណ
សាមគ្គី មានន័យជាភាសាខ្មែរថា “បង្រួបបង្រួម” ការបង្រួបបង្រួមជាកត្តាចម្បងដែលនាំឲ្យ មានភាពរីកចំរើន សេចក្តីសុខ សុវត្តិភាព ស្ថេរភាពនិងសេចក្ដីថ្លៃថ្នូរនៅក្នុងសង្គមជាតិទាំងមូល។ អត្តសញ្ញាណរបស់សាមគ្គីត្រូវបាន ចារិកឡើងដោយផ្ទាំងពណ៌ខៀវចាស់ និងពណ៌មាសចាស់នៅផ្នែកខាងក្រោយ រំលេចដោយអក្សរ “ស” ផុសចេញពីផ្ទាំងទាំងពីរ ហើយនៅផ្នែកខាងក្រោមនៃនិម្មិតសញ្ញាមានចារិកអក្សរជាភាសាអង់គ្លេស “SAMAKY”។ ពណ៌ខៀវចាស់តំណាងឲ្យភាពជាក់លាក់ ពិតប្រាកដនិងជឿជាក់មកលើស្ថាប័ន ពណ៌មាសចាស់តំណាងឲ្យ សន្តិភាព និង មាសប្រាក់ដែលទាក់ទងនឹងប្រតិបត្តិការអាជីវកម្មរបស់ស្ថាប័នប្រកបដោយ ភាពជឿជាក់និងដើម្បីឲ្យពួកគាត់ទទួលបាននូវទំនុកចិត្ត។ អក្សរ “ស” តំណាងឲ្យការសហការជាធ្លុងមួយឆ្ពោះទៅរក ភាពរីកចំរើន និង ជឿនលឿនរវាងគ្រឹះស្ថាន និងអតិថិជន ដើម្បីមានភាពថ្កុំថ្កើនរុងរឿងទាំងប្រជាជន និងសង្គមជាតិទាំងមូល។
ទីផ្សារគោលដៅ
ទីផ្សារគោលដៅរបស់សាមគ្គី គឺជាប្រជាពលរដ្ឋខ្មែរដែលមានបំណងបង្កើតនិងពង្រីកអាជីវកម្មជាលក្ខណ:គ្រួសារឬជាសហគ្រាសធុនតូច និងមធ្យមទៅតាមសមត្ថភាព បច្ចេកទេស និងបទពិសោធន៍របស់ប្រជាជនក្នុងគ្រប់វិស័យនៃសេដ្ឋកិច្ចជាតិ។